บทกวีร้อยลีลา_พลังธรรมชาติ

บทกวีร้อยลีลา_พลังธรรมชาติ

เส้นทางไหลของน้ำ ลาดส่งลงเนิน
ภูดอยผา ป่าเขาสูงค้อย
คันฮูน้อย ทางไปแน่นอั่ง
ไหลหลั่งล้น จนแตกมุ่นพัง

ปีก่อนครั้ง ฟากฝั่งเมืองลาว
แขวงเชียงขวาง เขื่อนพังเพม้าง
ทางคน-น้ำ ตามกันฟ้าวแล่น
แสนหลีกพ้น ไหลจ้นหลั่งนอง

ปีนี้ต้อง สองตื่มตามมา
ชลนาไหล ทั่วไปสูญสิ้น
คูคันน้ำ เพพังแตกฮั่ว
เกินยับยั้ง แฮงน้ำเซาะใน

ดนแต่ได้ ไซเซาะเจาะกิน
ดินในสัน ทุกวันแลงเช้า
หลายปีเข้า กัดเอาจนฮั่ว
กว่าสิฮู้ ฮูน้ำผ่านซึม

พังแตกตึ้ม น้ำถั่งถาโถม
โฮมลงฮู หลั่งพรูอัดอั้น
รวมกันเข้า ดันเอาฮอยฮั่ว
พังแตกม้าง สองข้างมุ่นมี

ธรรมชาตินี้ ยากที่ขัดขืน
ฝืนเก็บกัก อย่าหนักเกินต้าน
คานคันน้ำ ตามนากล้าหว่าน
ป้านลัดไว้ ยังได้มุ่นพัง

ฐานยับยั้ง ตั้งก่อคันคู
ปิดประตูทางไหล ใหญ่สูงขวางกั้น
วันคืนเคลื่อน ปีเดือนพ้นผ่าน
ฤดูกาลเปลี่ยนมื้อ คือกายเจ้าแก่ชรา

ฝนจากฟ้า น้ำบ่าถาโถม
โฮมลงมา บ่มีหยุดยั้ง
ขังเอาไว้ ทางไปบ่ปล่อย
ฮูแค่น้อย แฮงน้ำมากมี

คำกลอนชี้ เพียงส่องมองเห็น
เป็นแนวทาง อย่าขวางแฮงน้ำ
โมโหฮ้าย คือไฟไหม้ป่า
อย่าไปขวางผีกเว้น เป็นแท้ดั่งกัน

วันนี้ได้ เคราะห์ใหญ่สูญเสีย
สายวารี พัดพาเพม้าง
เสียงโฮฮ้อง ฟูมฟายไห้สั่น
ญาติพี่น้อง ไกลข้างห่างหนี

กรรมเก่ากี้ ผีห่าแนวใด
มาตามติด หนึ่งสองปีซ้อน
วอนทวยเทพ อินทร์พรหมหลิงหล่ำ
ปัดเคราะห์กรรมผ่านพ้น สุขล้นส่งพร

ภาพสะท้อน เป็นสื่อความหมาย
บรรยายกลอน ฮ่ำฮอนแลงเช้า
หัวใจเศร้า เอาคำฝากส่ง
จิตพะวงพี่น้อง โฮฮ้องป่วยใจ

ขอให้ได้ พ้นผ่านเร็ววัน..
ปันแฮงใจ ทั่วไทยโฮมตุ้ม
กุมมือไว้ กำลังใจบอกต่อ
ขอพี่น้อง ยืนสู้ต่อไป..
ส่งใจให้ทุกวัน...สู้ สู้ เด๊อ

#ขอเป็นกำลังใจให้พี่น้องสปป_ลาว

CR: กวีศิลป์ ถิ่นอุบล สฤษดิ์ พึ่งบารมี
๒๖ กรกฎาคม ๒๕๖๑ พฤหัสบดี ๐๗.๒๐ น.