อมศรี ศรี ฝ้ายเส้นนี้แม่นฝ้ายพระยาแถน ป่อนแขนมาพ่อสิผูก เอาเป็นลูกของพระยา ผูกกั้มซ้ายให้ขวัญเจ้ามา ผูกกั้มขวาให้ขวัญเจ้าอยู่ ให้เป็นคู่เทียมสอง ให้ปองดองฮักห่อ อยู่นำพ่อคูณเฮือน หลายปีเดือนให้เจ้าได้ลูกน้อย ทั้งข้อยข้าแลเงินคำ มีผู้นำเงินล้าน มีผู้ให้บ้านหลังงาม มีนาทามพันไฮ่ มีหมูหมากาไก่ ช้างม้าและวัวควาย นอนตื่นสวยให้เจ้าได้เงินล้าน ออกจากบ้านอย่าได้มีศัตรู ให้มีผู้ส่อยชูขนหาบ มีโชคลาภเนืองนอง มีข้าวของเต็มอั่ง ให้เจ้าได้นั่งเป็นเศรษฐี สองสามีจงควรคู่ ให้ทั้งสองเจ้าอยู่ถาวร ยามกินนอนอย่าอึดอยาก ของเหลือปากโภชนะอาหาร มีลูกหลานเต็มเหลือหลาก อย่าอึดอยากแนวใด๋ ให้ไปไวมาค่อง ให้ได้ท่องศิลธรรม จ่มมำ ๆ ไหว้พระเจ้า ให้เป็นพ่อเฒ่า แม่เฒ่าทั้งสอง ให้ได้ถือไม้เท้ายอดทอง ถือตะบองยอดเพชร อย่าได้บกเงินบาท อย่าได้แนวใด๋ ให้สมหวังเหลือเหตุ ให้เป็นดั่งพระเวสสันดร คนออนซอนเหลือหลาก มีลูกมากปานกะปูยามนา อุ อะ มุ มะ มูลมา สวาหุม
ไม่มีความคิดเห็น:
แสดงความคิดเห็น